यंदाचा राजर्षी शाहू पुरस्कार डॉ. जयसिंगराव पवार यांना मरणोपरांत जाहीर
कोल्हापूर : राजर्षी शाहू छत्रपती मेमोरियल ट्रस्टतर्फे दिला जाणारा यंदाचा प्रतिष्ठेचा राजर्षी शाहू पुरस्कार ज्येष्ठ इतिहास संशोधक, लेखक आणि अभ्यासक स्वर्गीय डॉ. जयसिंगराव पवार यांना जाहीर करण्यात आला आहे. ही माहिती जिल्हाधिकारी डॉ. विजय राठोड यांनी दिली.
इतिहास संशोधन, सामाजिक प्रबोधन आणि शैक्षणिक क्षेत्रातील उल्लेखनीय योगदानाची दखल घेत डॉ. पवार यांची या पुरस्कारासाठी निवड करण्यात आली आहे. मराठा इतिहास, छत्रपती शिवाजी महाराज यांचे चरित्र आणि सामाजिक इतिहास या विषयांवरील त्यांच्या संशोधनपर लेखनाला राज्यभरात मान्यता मिळाली आहे.
राजर्षी शाहू महाराज यांच्या विचारांचा प्रसार आणि समाजकारणातील योगदान जपणाऱ्या व्यक्तींना हा पुरस्कार दरवर्षी प्रदान केला जातो. यंदा डॉ. जयसिंगराव पवार यांची निवड झाल्याने शैक्षणिक आणि इतिहास संशोधन क्षेत्रातून समाधान व्यक्त करण्यात येत आहे.
पुरस्कार वितरण समारंभाची तारीख आणि अन्य तपशील लवकरच जाहीर करण्यात येणार असल्याचे जिल्हा प्रशासनाकडून सांगण्यात आले.