कोल्हापूर : ज्येष्ठ शिक्षणतज्ज्ञ, माजी राज्यपाल पद्मश्री डॉ. डी. वाय. पाटील यांचं आज सकाळी कोल्हापुरातील राहत्या निवासस्थानी वयाच्या ९२ व्या वर्षी निधन झालं . त्यांच्या निधनानं शैक्षणिक, सामाजिक आणि सार्वजनिक जीवनातील एक युग संपल्याची भावना व्यक्त होतीय . त्यांच्या पार्थिवाचं अखेरचं दर्शन घेण्यासाठी विविध क्षेत्रांतील मान्यवरांसह नागरिकांनी मोठी गर्दी केली.

पद्मश्री डॉ. डी. वाय. पाटील यांचं आज सकाळी दहा वाजता कोल्हापुरातील त्यांच्या निवासस्थानी निधन झालं . त्यांच्या निधनाची बातमी समजताच कोल्हापूरसह राज्यभरातून शोक व्यक्त करण्यात येत आहे. त्यांच्या पार्थिवाचं अखेरचं दर्शन घेण्यासाठी सामाजिक, शैक्षणिक, राजकीय, क्रीडा अशा विविध क्षेत्रांतील मान्यवरांसह नागरिकांनी मोठी गर्दी केली होती. प्रत्येकाच्या ओठांवर त्यांच्या कार्याचा गौरव आणि मनात त्यांच्याविषयी कृतज्ञतेची भावना होती.

डॉ. डी. वाय. पाटील यांनी शिक्षण क्षेत्रात उभारलेलं उत्तुंग कार्य महाराष्ट्राच्या शैक्षणिक इतिहासातील एक महत्त्वपूर्ण पर्व मानलं जातं . व्यावसायिक शिक्षण सर्वसामान्य विद्यार्थ्यांपर्यंत पोहोचवण्यासाठी त्यांनी आयुष्यभर अविरत परिश्रम घेतलं . त्यांच्या दूरदृष्टीतून उभा राहिलेला डी. वाय. पाटील शैक्षणिक समूह आज देश-विदेशातील लाखो विद्यार्थ्यांसाठी ज्ञानाचं केंद्र बनलाय .

शिवाजी विद्यापीठाचे माजी कुलगुरू डॉ. माणिकराव साळुंखे यांनी भावना व्यक्त करताना, खाजगी शिक्षणसंस्था चालवत असतानाही गरीब विद्यार्थ्यांना शिक्षणाची संधी मिळावी यासाठी डॉ. पाटील यांनी सातत्यानं प्रयत्न केल्याचं सांगितलं . राज्यपाल म्हणून त्यांच्या कार्यकाळातील निर्णयांचं त्यांनी कौतुक केलं .

गोखले कॉलेजचे जयकुमार देसाई यांनी डॉ. डी. वाय. पाटील हे कोल्हापूरसह महाराष्ट्राचे भूषण होते.असं सांगून त्यांच्या जाण्यानं मोठी पोकळी निर्माण झाल्याची भावना व्यक्त केली.

डॉ. डी. वाय. पाटील यांच्या जाण्यानं आपला माणूस हरपल्याची भावना त्यांच्या निकटवर्तीय सहकारी अशोक देसाई यांनी व्यक्त केली.

माजी खासदार जयवंतराव आवळे यांनी शून्यातून विश्व निर्माण करणारं कर्तृत्ववान नेतृत्व अशा शब्दात डॉ. डी. वाय. पाटील यांना श्रद्धांजली अर्पण केली.

नाबार्डचे माजी अध्यक्ष यशवंतराव थोरात यांनी भावूक होत, “आज महाराष्ट्रातील एका पर्वाचा अंत झाला,” अशा शब्दांत आपल्या भावना व्यक्त केल्या.

माजी आमदार संजय घाटगे यांनी डॉ. डी. वाय. पाटील यांनी राजकारणापेक्षा शिक्षण क्षेत्राला प्राधान्य देत शैक्षणिक क्रांती घडवून आणल्याचं सांगितलं.

यावेळी माजी राज्यमंत्री भरमूअण्णा पाटील, विशेष पोलीस महानिरीक्षक रंजनकुमार शर्मा, जिल्हाधिकारी डॉ. विजय राठोड, पोलीस अधीक्षक निलोत्पल, महापालिकेतील काँग्रेसचे विरोधी पक्षनेते राजेश लाटकर, गटनेते इंद्रजीत बोंद्रे, जिल्हा परिषदेतील काँग्रेसचे गटनेते एकनाथ पाटील, आजी-माजी नगरसेवक, आजी-माजी जिल्हा परिषद सदस्य तसंच सामाजिक, शैक्षणिक, राजकीय, क्रीडा आणि विविध क्षेत्रांतील मान्यवरांनी डॉ. डी. वाय. पाटील यांचं अखेरचं दर्शन घेत त्यांना श्रद्धांजली वाहिली .