मुंबई : महाराष्ट्र नवनिर्माण सेनेचे अध्यक्ष राज ठाकरे यांनी मुख्यमंत्री देवेंद्र फडणवीस यांना उद्देशून फेसबुकवर एक खुले पत्र प्रसिद्ध करत भाजपच्या केंद्र आणि राज्यातील कार्यपद्धतीवर तीव्र टीका केली आहे. सत्तेतील काही लोकांमध्ये अहंकार वाढल्याचा आरोप करत त्यांनी महाराष्ट्राच्या राजकीय परंपरेबाबतही चिंता व्यक्त केली आहे.

राज ठाकरे यांनी पत्रात म्हटले आहे की, देशभरात केंद्रातील सत्ताधाऱ्यांच्या वागणुकीबद्दल नाराजी व्यक्त होत असून त्याचा परिणाम महाराष्ट्राच्या राजकारणावरही दिसू लागला आहे. महाराष्ट्रातील सुसंस्कृत आणि संयमी राजकारणाची परंपरा जपली गेली पाहिजे, अशी अपेक्षा त्यांनी व्यक्त केली.

पत्रात त्यांनी अलीकडील एका वादग्रस्त घटनेचा संदर्भ देत, लोकांच्या मृत्यूवर हसल्याचा आरोप असलेल्या एका आमदार आणि पक्ष पदाधिकाऱ्यावर अद्याप कोणतीही कठोर कारवाई झालेली नसल्याबद्दल मुख्यमंत्री फडणवीस यांच्यावर प्रश्नचिन्ह उपस्थित केले. "सत्तेचा माज" आणि सत्तेचा गैरवापर याबाबतही त्यांनी भाष्य करत, मुख्यमंत्री म्हणून फडणवीस यांनी अशा प्रकारांवर स्पष्ट भूमिका घ्यावी, अशी अपेक्षा व्यक्त केली.

राज ठाकरे यांनी पुढे म्हटले आहे की, पूर्वी महाराष्ट्रातील नेते स्वपक्षातील व्यक्तीने चूक केली तरी तिचे समर्थन करत नसत. मात्र, सध्या चुकीच्या कृत्यांवर पांघरूण घालण्याची प्रवृत्ती वाढल्याचे दिसत असून त्यामुळे महाराष्ट्राच्या राजकीय संस्कृतीला धक्का बसत असल्याची टीका त्यांनी केली.

राज्यातील काही मंत्र्यांची वादग्रस्त विधाने, काही नेत्यांकडून दिसणारी असंवेदनशीलता आणि त्यावर मुख्यमंत्र्यांचे मौन यावरही त्यांनी प्रश्न उपस्थित केले. चुकीचे वर्तन करणाऱ्यांवर कठोर कारवाई करून आवश्यक असल्यास राजीनामे घ्यावेत, अशी मागणीही त्यांनी पत्रातून केली.

पत्राच्या शेवटी, मुख्यमंत्री देवेंद्र फडणवीस हे सुज्ञ नेतृत्व असल्याचे नमूद करत, महाराष्ट्राच्या राजकीय परंपरेला साजेशी भूमिका घेऊन चुकीच्या प्रवृत्तींना आळा घालावा, असे आवाहन राज ठाकरे यांनी केले आहे.

दरम्यान, राज ठाकरे यांच्या या खुल्या पत्राची राजकीय वर्तुळात चर्चा सुरू असून, यावर मुख्यमंत्री देवेंद्र फडणवीस आणि भाजपकडून यावर अद्याप प्रतिक्रिया आली नाही.