शक्तीपीठ महामार्गाविरोधात पुणे–सोलापूर महामार्गावर रास्ता रोको; राजू शेट्टी आणि पोलिसांमध्ये शाब्दिक चकमक
सोलापूर : शक्तीपीठ महामार्गाच्या विरोधात सोलापूर जिल्ह्यातील अरण परिसरातील शेतकऱ्यांनी रविवारी पुणे–सोलापूर महामार्गावर रास्ता रोको आंदोलन करत सरकारविरोधात तीव्र संताप व्यक्त केला. राजू शेट्टी यांच्या नेतृत्वाखाली झालेल्या या आंदोलनात मोठ्या संख्येने बाधित शेतकरी सहभागी झाले होते.
संत सविता माळी यांच्या संजीवन समाधीस्थळ असलेल्या अरणसह पंचक्रोशीतील गावांवर शक्तीपीठ महामार्गाचा परिणाम होणार असल्याचा आरोप आंदोलकांनी केला. शेती, घरे आणि धार्मिक स्थळांचे नुकसान होण्याची भीती व्यक्त करत शेतकऱ्यांनी महामार्गावर ठिय्या आंदोलन सुरू केले.
आंदोलनामुळे पुणे–सोलापूर महामार्गावरील वाहतूक काही काळ ठप्प झाली होती. “शक्तीपीठ महामार्ग रद्द करा”, “शेतकरी विरोधी निर्णय चालणार नाहीत” अशा घोषणा देत आंदोलकांनी सरकारचा निषेध केला.
दरम्यान, आंदोलन हटवण्याचा प्रयत्न पोलिसांनी केल्यानंतर वातावरण तणावपूर्ण बनले. यावेळी राजू शेट्टी आणि पोलिस अधिकाऱ्यांमध्ये शाब्दिक चकमक झाल्याचे पाहायला मिळाले. पोलिसांनी आंदोलकांना समजावून सांगण्याचा प्रयत्न केला; मात्र शेतकरी आंदोलनावर ठाम राहिले.
घटनेनंतर परिसरात मोठा पोलिस बंदोबस्त तैनात करण्यात आला असून परिस्थिती नियंत्रणात असल्याची माहिती प्रशासनाकडून देण्यात आली.