कोल्हापूर : महिला सक्षमीकरण, सामाजिक न्याय आणि परिवर्तनवादी विचारांच्या प्रसारासाठी सातत्याने कार्यरत असलेल्या जिजाऊ ब्रिगेडच्या कोल्हापूर जिल्हाध्यक्षपदी ज्येष्ठ सामाजिक कार्यकर्त्या, प्रभावी वक्त्या, लेखिका आणि महिला समुपदेशक रंजना शिवाजी पाटील यांची नियुक्ती करण्यात आली आहे. त्यांच्या निवडीमुळे जिजाऊ ब्रिगेडच्या कार्यकर्त्यांमध्ये उत्साहाचे वातावरण निर्माण झाले असून विविध सामाजिक क्षेत्रांतून त्यांचे अभिनंदन करण्यात येत आहे.

राजमाता जिजाऊ यांच्या प्रेरणादायी विचारांचा वारसा जपत जिजाऊ ब्रिगेड गेल्या अनेक वर्षांपासून महिला हक्क, सामाजिक समता, संविधानिक मूल्यांचे संवर्धन, शिक्षण, अन्यायाविरुद्ध संघर्ष आणि समाजप्रबोधनासाठी राज्यभर कार्यरत आहे. समाजातील वंचित, पीडित आणि दुर्बल घटकांच्या प्रश्नांना वाचा फोडण्याचे कार्य संघटनेने सातत्याने केले आहे.

रंजना पाटील या गेली पंधरा वर्षे जिजाऊ ब्रिगेडमध्ये निष्ठेने आणि समर्पित भावनेने कार्यरत आहेत. संघटनेतील विविध जबाबदाऱ्या यशस्वीपणे सांभाळताना त्यांनी महिला प्रश्न, सामाजिक अन्याय, शिक्षण, आरोग्य आणि जनजागृती या क्षेत्रांत उल्लेखनीय योगदान दिले आहे. त्यांच्या नेतृत्वगुणांमुळे आणि समाजाप्रती असलेल्या बांधिलकीमुळे त्या कार्यकर्त्यांमध्ये प्रेरणास्थान म्हणून ओळखल्या जातात.

एक प्रभावी वक्त्या म्हणून त्यांनी असंख्य व्याख्यानांद्वारे महिलांमध्ये आत्मविश्वास, स्वाभिमान आणि सामाजिक भान जागृत करण्याचे कार्य केले आहे. लेखिका म्हणूनही त्यांनी महिलांचे प्रश्न, सामाजिक वास्तव आणि समकालीन घडामोडींवर विविध नियतकालिकांत सातत्याने लेखन केले आहे. त्यांच्या लेखणीने अनेकदा अन्यायग्रस्तांच्या प्रश्नांकडे समाजाचे लक्ष वेधून घेतले आहे.

पीडित महिलांच्या हक्कांसाठी त्यांनी केवळ विचार मांडण्यापुरते न थांबता प्रत्यक्ष संघर्ष उभारला आहे. अन्यायाविरोधात आवाज उठवताना त्यांनी विविध आंदोलने, निवेदने आणि जनजागृती मोहिमांमध्ये सक्रिय सहभाग नोंदविला आहे. कोल्हापूर जिल्ह्यातील अनेक सामाजिक प्रश्नांवर त्यांनी वेळोवेळी ठाम भूमिका घेत जनतेच्या न्याय्य मागण्यांसाठी प्रयत्न केले आहेत.

त्यांच्या प्रदीर्घ सामाजिक कार्याची, संघटनात्मक कौशल्याची, नेतृत्वक्षमतेची आणि महिला सक्षमीकरणासाठी केलेल्या अविरत योगदानाची दखल घेत जिजाऊ ब्रिगेडने त्यांच्यावर कोल्हापूर जिल्हाध्यक्षपदाची जबाबदारी सोपवली आहे. त्यांच्या नेतृत्वाखाली जिजाऊ ब्रिगेडचे कार्य अधिक व्यापक होईल, नव्या कार्यकर्त्यांना दिशा मिळेल आणि महिला सक्षमीकरणाच्या चळवळीला अधिक बळ प्राप्त होईल, असा विश्वास व्यक्त केला जात आहे.

समाजकारण, लेखन, प्रबोधन आणि संघर्ष यांचा प्रभावी संगम असलेल्या रंजना शिवाजी पाटील यांना जिजाऊ ब्रिगेडच्या कोल्हापूर जिल्हाध्यक्षपदी निवड झाल्याबद्दल त्यांचं सगळीकडे अभिनंदन होत आहे.