नवी दिल्ली – अमेरिकेच्या ४७ व्या अध्यक्षपदी डोनाल्ड ट्रम्प नुकतेच विराजमान झाले आहेत. यावेळी त्यांनी अनेक मोठे निर्णय घेतले आहेत. यावेळी त्यांनी जागतिक आरोग्य संघटनेतून बाहेर पडण्याचा निर्णय घेतला आहे तसेच बेकायदेशीर स्थलांतरितांच्या प्रवेशावर बंदी घातली असून तृतीयपंथी ही संकल्पना रद्द केली आहे. अध्यक्ष डोनाल्ड ट्रम्प यांनी जागतिक आरोग्य संघटनेबाबत घेतलेल्या निर्णयामुळे अमेरिका जागतिक आरोग्य संघटनेचा भाग नसणार आहे. यासंबंधीच्या आदेशांवर ट्रम्प यांनी स्वाक्षरी केली आहे. अमेरिका जागतिक आरोग्य संघटनेला सर्वाधिक निधी देणारा देश होता परंतु ट्रम्प यांच्या या निर्णयामुळे जागतिक आरोग्य संघटनेला मिळणारा निधी कमी होणार आहे. २०२४-२५ च्या अमेरिकेच्या अर्थसंकल्पात जागतिक आरोग्य संघटनेसाठी ६६२ मिलियन अमेरिकन डॉलर्सच्या निधीची तरतूद करण्यात आली होती.