कोल्हापुरात ‘दक्षता जनजागृती सप्ताह’ला सुरुवात; भ्रष्टाचार निर्मूलनाची घेतली शपथ
कोल्हापूर - “जीवनाच्या सर्व क्षेत्रात सच्चेपणा आणि कायद्याचं पालन करेन. लाच घेणार नाही, लाच देणार नाही. सर्व कामं प्रामाणिकपणे आणि पारदर्शक पद्धतीनं करेन. जनहितासाठी कार्य करेन,” अशी शपथ घेऊन दक्षता जनजागृती सप्ताहाचा आज जिल्हाधिकारी कार्यालयात प्रारंभ झाला. लाचलुचपत प्रतिबंधक विभागाच्या वतीने आयोजित या उपक्रमात जिल्हाधिकारी अमोल येडगे यांनी उपस्थित अधिकारी व कर्मचाऱ्यांसह भ्रष्टाचार निर्मूलनाची प्रतिज्ञा घेतली. या प्रसंगी राज्यपाल व मुख्यमंत्री महोदयांचा संदेश देखील उपस्थितांना वाचून दाखवण्यात आला. केंद्रीय सतकर्ता आयोग, नवी दिल्ली यांच्या निर्देशानुसार २७ ऑक्टोबर ते २ नोव्हेंबर दरम्यान हा सप्ताह साजरा केला जाणार आहे.
“लाचेची मागणी करणाऱ्यांविरुद्ध त्वरित तक्रार द्या आणि भ्रष्टाचार निर्मूलन मोहिमेत सक्रिय सहभाग नोंदवा.” असे लाचलुचपत विभागाने यावेळी नागरिकांना आवाहन केलं.
कार्यक्रमास अपर जिल्हाधिकारी संजय शिंदे, निवासी उपजिल्हाधिकारी संजय तेली, महसूल उपजिल्हाधिकारी डॉ. संपत खिलारी, तसेच लाचलुचपत प्रतिबंधक विभागाच्या पोलीस उपअधीक्षक वैष्णवी पाटील उपस्थित होत्या.