अंबाबाई देवीला तोफेची सलामी देवून आजपासून नवरात्रोत्सवाला सुरूवात
कोल्हापूर - राज्यभरात शारदीय नवरात्रोत्सवाला आजपासून सुरुवात झाली आहे. साडे तीन शक्तिपीठांपैकी एक असणाऱ्या अंबाबाई मंदिरात नवरात्रोत्सवाचा उत्साह पहायला मिळत आहे. प्रथा-परंपरेनुसार, अंबाबाई मंदिरात तोफेची सलामी देण्यात आली आहे. तोफेच्या सलामीनंतर अंबाबाई मंदिराच्या गाभाऱ्यात घटस्थापना करून शारदीय नवरात्र उत्सवाची सुरुवात करण्यात आली.
शारदीय नवरात्रोत्सवाचा पहिला दिवस असल्याने असंख्य भाविकांनी अंबाबाईच्या दर्शनासाठी एकच गर्दी केली आहे. भाविकांनी मंदिर परिसर फुलून गेल्याचे पहायला मिळत आहे. भाविकाकडून अंबाबाईला साडी-चोळी आणि खण-नारळाची ओटी आवर्जून भरली जाते. त्यातच आज नवरात्रोत्सवाचा पहिलाच दिवस असल्याने महिलांमध्ये देखील आनंदाचे वातावरण आहे. अंबाबाई मंदिरात नवरात्रोत्सवाच्या निमित्ताने मंदिर परिसरात धार्मिक कार्यक्रमांना देखील सुरुवात झाली आहे.