अखेर निलेश घायवळचा पासपोर्ट रद्द...
पुणे - पुण्यातील कुख्यात गुंड निलेश घायवळ याच्या पासपोर्टला परवानगी कोणी दिली ? यावर राजकारण रंगलं होतं आणि अखेर घायवळचा पासपोर्ट रद्द करण्यात आला आहे. त्यामुळे त्याला चांगलाच झटका बसला आहे.
पासपोर्ट प्रदेश कार्यालयातून पासपोर्ट रद्द करण्याची ऑर्डर जारी झाली आहे. पुणे पोलिसांनी काही दिवसांपूर्वी न्यायालयात तसेच पासपोर्ट प्रादेशिक कार्यालयात घायवळ बाबत अहवाल सादर केला होता. त्या अनुषंगाने ही कारवाई करण्यात आली आहे.
तपासामध्ये समोर आले आहे की, पोलिसांना चकवा देत घायवळ परदेशात पळून गेला. विशेष म्हणजे त्यांच्यावर गंभीर गुन्हे दाखल असताना त्याला पासपोर्ट कसा मिळाला याविषयी पोलिस प्रशासनावरच ताशेरे ओढले जात होते. घायवळने पोलिसांनी केलेल्या चौकशीमध्ये अहिल्यानगरमधील आपल्या गावाच्या पत्तावर त्याने पासपोर्ट काढला. विशेष म्हणजे पासपोर्टसाठी त्याने आपल्या आडनावात देखील बदल केला. 'घायवळ' ऐवजी 'गायवळ' नावाची कागदपत्रे त्याने सादर केली. आता त्याचा पासपोर्ट रद्द करण्यात आला आहे.