कोल्हापूर ACB च्या DYSP वैष्णवी पाटील यांच्या कारचा भीषण अपघात; दोघांचा जागीच मृत्यू, पाटील यांची प्रकृती स्थिर
कोल्हापूर : कोल्हापूर अँटी करप्शन ब्युरो (ACB) मध्ये कार्यरत असलेल्या DYSP वैष्णवी पाटील यांच्या इनोव्हा कारचा कर्नाटकातील चित्रदुर्ग जिल्ह्याजवळ भीषण अपघात झाला. या दुर्घटनेत त्यांच्या सोबत प्रवास करणाऱ्या त्यांच्या आई आणि चालकाचा जागीच मृत्यू झाला असून DYSP वैष्णवी पाटील यांच्यासह तिघे जखमी झाले आहेत. पाटील यांची प्रकृती सध्या स्थिर असल्याची माहिती डॉक्टरांनी दिली आहे.
DYSP वैष्णवी पाटील बेंगलोरहून कोल्हापूरकडे परतत असताना आज पहाटे हा अपघात झाला. त्या ज्या इनोव्हा कारमधून प्रवास करत होत्या, ती कार अचानक एका लॉरीला जाऊन धडकली. ही धडक इतकी भीषण होती की इनोव्हा कारचे मोठ्या प्रमाणात नुकसान झाले. कारमधील दोघा जणांचा घटनास्थळीच मृत्यू झाला.
अपघातानंतर जखमींना तातडीने चित्रदुर्ग येथील जिल्हा रुग्णालयात दाखल करण्यात आले. DYSP वैष्णवी पाटील यांच्यावर तेथे उपचार सुरू असून त्यांची प्रकृती स्थिर असल्याचे सांगण्यात आले आहे. अन्य जखमींवरही उपचार सुरू आहेत. अपघाताचे नेमके कारण अद्याप स्पष्ट झालेले नसून इनोव्हा आणि लॉरी यांच्यातील जोरदार धडकेत ही दुर्घटना घडल्याची प्राथमिक माहिती समोर आली आहे. या घटनेमुळे कोल्हापूर पोलीस दलासह अँटी करप्शन ब्युरो वर्तुळात मोठी खळबळ उडाली आहे.