जाहिरात परवानगीसाठी सोमवार दुपारपर्यंतच मुदत; प्रचार समाप्तीनंतर जाहिरातींना बंदी
कोल्हापूर : कोल्हापूर महानगरपालिका सार्वत्रिक निवडणूक २०२५-२६ च्या पार्श्वभूमीवर जाहिरातींच्या पूर्वप्रमाणन व परवानगीसाठी अर्ज सादर करण्याची अंतिम मुदत सोमवार, दि. १२ जानेवारी रोजी दुपारी २ वाजेपर्यंत निश्चित करण्यात आली आहे. त्यानंतर प्राप्त होणारे अर्ज स्वीकारले जाणार नाहीत, अशी माहिती निवडणूक प्रशासनाने दिली आहे.
निवडणूक प्रक्रियेच्या अनुषंगाने ‘माध्यम प्रमाणन व संनियंत्रण समिती माध्यम कक्ष’ स्थापन करण्यात आला असून, हा कक्ष बागल मार्केट, राजारामपुरी येथील नगररचना विभाग कार्यालयाशेजारी कार्यरत आहे. जाहिरात प्रसिद्ध करण्याच्या तारखेच्या किमान पाच दिवस आधी अर्ज सादर करणे बंधनकारक आहे.
महानगरपालिकांच्या सार्वत्रिक निवडणुकांसाठी जाहीर प्रचाराची मुदत १३ जानेवारी २०२६ रोजी सायंकाळी ५.३० वाजता संपणार आहे. त्यामुळे प्रचार कालावधी संपल्यानंतर मुद्रित, इलेक्ट्रॉनिक तसेच अन्य कोणत्याही माध्यमांतून निवडणूकविषयक जाहिराती प्रसिद्ध किंवा प्रसारित करण्यास पूर्णतः बंदी राहणार आहे, असे राज्य निवडणूक आयुक्त दिनेश वाघमारे यांनी स्पष्ट केले आहे.
महानगरपालिका निवडणुकांसाठी १५ जानेवारी २०२६ रोजी सकाळी ७.३० ते सायंकाळी ५.३० या वेळेत मतदान होणार आहे. संबंधित कायद्यानुसार मतदानाच्या ४८ तास आधी जाहीर प्रचार थांबविणे आवश्यक असल्याने, १३ जानेवारी रोजी सायंकाळी ५.३० नंतर कोणत्याही स्वरूपात जाहिरात प्रसारित करता येणार नाही. त्यामुळे त्या कालावधीनंतर जाहिरातींच्या पूर्वप्रमाणन अथवा परवानगीचा प्रश्नच उद्भवत नाही.
यासंदर्भातील सविस्तर नियम व अटी राज्य निवडणूक आयोगाच्या ९ ऑक्टोबर २०२५ रोजी जारी करण्यात आलेल्या ‘निवडणुकांच्या प्रयोजनार्थ प्रसारमाध्यम संनियंत्रण व जाहिरात प्रमाणन आदेश, २०२५’ मध्ये नमूद करण्यात आल्या आहेत.