आगामी निवडणुकीत ईव्हीएमसोबत व्हीव्हीपॅट बसवण्यासाठी काँग्रेसची न्यायालयात धाव...
नागपूर - राज्यातील आगामी स्थानिक स्वराज्य संस्थांच्या निवडणुकांमध्ये ईव्हीएमसोबत व्हीव्हीपॅट बसवा, अन्यथा मत पत्रिकांद्वारे निवडणुका घ्या, या मागणीसाठी काँग्रेसने न्यायालयात धाव घेतली आहे.
काँग्रेस नेते प्रफुल्ल गुडधे यांनी नागपूर खंडपीठात याचिका दाखल केली आहे. यावर न्यायमूर्ती अनिल किलोर यांच्या खंडपीठाने राज्य निवडणूक आयोगाला नोटीस बजावत 18 नोव्हेंबरपर्यंत उत्तर देण्यास सांगितले आहे.
महाराष्ट्र राज्य निवडणूक आयोगाने आगामी स्थानिक स्वराज्य संस्था निवडणुकीत व्होटर व्हेरिफाइड पेपर ऑडिट ट्रेल (व्हीव्हीपॅट) यंत्रणेचा वापर न करण्याचा निर्णय घेतला आहे. या निर्णयाला काँग्रेसचे राष्ट्रीय सचिव प्रफुल्ल गुडधे यांनी आव्हान दिले आहे. या व्हीव्हीपॅट यंत्रणेमुळे मतदारांना त्यांचे मत योग्य उमेदवाराला गेल्याची खात्री पटते. त्यामुळे, ईव्हीएमसोबत व्हीव्हीपॅटचा वापर करण्यात यावा, अशी मागणी याचिकेत करण्यात आली आहे.