तांबड्या तळ्यात मासेमाराचा दुर्दैवी मृत्यू; पट्टणकडोली परिसरात हळहळ
हातकणंगले – हातकणंगले तालुक्यातील पट्टणकडोलीजवळील तांबड्या तळ्यात मासे पकडण्यासाठी गेलेल्या मासेमाराचा दुर्दैवी मृत्यू झाल्याची घटना रविवारी उघडकीस आली. वसगडे गावातील दिलीप रामचंद्र नरशिंगे (वय ६०) हे नेहमीप्रमाणे मासेमारीसाठी गेले असता, कमळाच्या फुलांच्या जाळ्यात अडकून त्यांचा श्वास घुटमळून मृत्यू झाला.
दिलीप नरशिंगे हे व्यावसायिक मासेमार होते. नेहमीप्रमाणे त्यांनी तांबड्या तळ्यात मासे पकडण्यासाठी उतरणी केली होती. मात्र पाण्यात कमळांच्या झाडांचा घनदाट जाळ असल्याने त्यात अडकून ते बाहेर पडू शकले नाहीत. श्वास गुदमरल्याने त्यांचा घटनास्थळीच मृत्यू झाला. त्यांच्या पश्चात पत्नी, एक मुलगा आणि एक मुलगी असा परिवार आहे. त्यांच्या अकस्मात निधनाने संपूर्ण वसगडे गावात आणि परिसरात हळहळ व्यक्त केली जात आहे. या घटनेची नोंद हुपरी पोलीस स्टेशनमध्ये करण्यात आली असून, पोलीस उपनिरीक्षक अशोक चव्हाण, एपीआय विकास शिंदे, तसेच होमगार्ड श्रीपती कांबळे या अधिकाऱ्यांकडून तपास सुरू आहे.