दादर – गर्दीने ओसंडून वाहणाऱ्या दादर रेल्वे स्थानकावर शुक्रवारी सायंकाळी घडलेली घटना पाहणाऱ्यांच्या अंगावर काटा आणणारी होती. दादर–अमरावती रेल्वे स्थानकात येत असताना एका तरुण प्रवाशाचा अचानक तोल गेला आणि तो थेट प्लॅटफॉर्मवरून रेल्वेखाली कोसळला. काही क्षणांतच संपूर्ण रेल्वे त्याच्यावरून धडधडत निघून गेली. उपस्थित प्रवाशांचे श्वास रोखले गेले; डोळ्यांसमोर मृत्यू अटळ वाटत होता.

मात्र नियतीने वेगळाच निर्णय घेतला होता. तरुणाने प्रसंगावधान राखत एका जागी स्थिर राहणे पसंत केले. रेल्वेचे डबे एकामागून एक निघून गेले, पण तो चमत्कारिकरीत्या गंभीर इजेशिवाय बचावला. काही क्षणांनी सर्वांनी सुटकेचा निश्वास सोडला, मात्र त्याला बाहेर काढण्याचे मोठे आव्हान समोर उभे राहिले. याच वेळी कोल्हापूरकडे जाण्यासाठी महालक्ष्मी एक्सप्रेसची प्रतीक्षा करत असलेले विधानपरिषदेतील कॉंग्रेसचे गटनेते आमदार सतेज पाटील यांनी घडलेला प्रकार पाहताच क्षणाचाही विलंब न करता पुढाकार घेतला. गर्दी, गोंधळ आणि भीती याकडे दुर्लक्ष करत त्यांनी स्वतः पुढे जात युवकाला हात दिला. इतर प्रवाशांच्या मदतीने त्यांनी त्या तरुणाला सुरक्षितपणे वर ओढले.

घटनास्थळी आणखी एक माणुसकीचा क्षण पाहायला मिळाला. युवक बाहेर आल्यानंतर आमदार पाटील यांनी केवळ मदत करून मोकळे न होता, त्याची सविस्तर विचारपूस केली. कुठे दुखापत झाली आहे का, चक्कर येतेय का, चालताना त्रास होतोय का, याची त्यांनी वैद्यकीय दृष्टीने चौकशी केली. आवश्यक असल्यास उपचार मिळावेत, यासाठी तत्काळ रेल्वे प्रशासनाशी संपर्क साधण्याच्या सूचनाही दिल्या. या घटनेनंतर स्थानकावर काही काळ शांतता पसरली. मृत्यूच्या दाढेतून परत आलेल्या त्या तरुणाच्या डोळ्यांत कृतज्ञतेचे अश्रू होते, तर उपस्थितांच्या मनात एका प्रश्नाचे उत्तर मिळाले होते. धावपळीच्या, गर्दीच्या शहरातही माणुसकी अजून शिल्लक आहे. दादर स्थानकावर घडलेली ही घटना अपघातातून बचावाची कथा म्हणूनच नव्हे, तर धैर्य, संवेदनशीलता आणि जबाबदारी यांचे प्रतीक ठरली आहे