कोल्हापूर -  इतर मागास बहुजन कल्याण विभागाच्या आश्रमशाळेतील मुलींच्या वसतीगृहांना भेटी देऊन पाहणी करा. येथील मुलींना वसतीगृहांत मुलभूत सोयी -सुविधा मिळत असल्याची खात्री करा. आश्रमशाळांतील मुलींच्या वसतीगृहांमध्ये कोणताही गैरप्रकार होणार नाही, याची दक्षता घ्या, अशा सूचना राज्य मागासवर्ग आयोगाच्या सदस्यांनी केल्यायत .कोल्हापूर  जिल्हाधिकारी कार्यालयात ही बैठक  संपन्न झाली.

राज्य मागासवर्ग आयोगाचे सदस्य प्रा. मच्छिंद्रनाथ तांबे, प्रा. डॉ. गोविंद काळे, आणि डॉ. मारुती शिकारे यांची त्रिस्तरीय समिती आज कोल्हापूर दौऱ्यावर आली होती. यावेळी त्यांची जिल्हाधिकारी कार्यालयात बैठक आयोजित करण्यात आली. या बैठकीला  जिल्हाधिकारी अमोल येडगे, निवासी उपजिल्हाधिकारी संजय तेली, जात पडताळणी समितीच्या अध्यक्ष डॉ.स्वाती देशमुख -पाटील, संशोधन अधिकारी संभाजी पोवार, इतर मागास बहुजन कल्याण विभागाच्या सहायक संचालक सुनिता नेर्लीकर यांच्यासह उपविभागीय अधिकारी आणि संबंधित अधिकारी उपस्थित होते.

या बैठकीत  जिल्ह्यातील कुलवाडी, कुळवाडी या जात समूहाबाबत चर्चा करण्यात आली . त्याचबरोबर १ जुलै २०२४ ते ३० जून २०२५ या कालावधीतील इतर मागासवर्ग, विशेष मागासप्रवर्ग, विमुक्त जाती, भटक्या जमाती संवर्गास वितरित केलेली जात प्रमाणपत्रं  आणि जात वैधता प्रमाणपत्र याबाबत आढावा घेण्यात आला.  जात प्रमाणपत्रांचं  वितरण, जात प्रमाणपत्र पडताळणी यांत काही अडचण आल्यास राज्य मागासवर्ग आयोगाला माहिती द्यावी, या अडचणींचं  लवकरात लवकर निराकरण करण्यात येईल, असं  राज्य मागासवर्ग आयोगाच्या सदस्यांनी यावेळी सांगितलं . यावेळी जिल्ह्यातील  कुणबी, कुळवाडी संमिश्र नोंदी बाबतचा तालुकानिहाय आढावा घेण्यात आला. तालुकास्तरावर जात वैधता प्रमाणपत्रं जलदगतीनं  देण्यासाठी योग्य नियोजन करा. जिल्ह्यातील आश्रमशाळांना अचानक भेटी देऊन तिथल्या  परिस्थितीची पाहणी करा. वसतीगृहांमध्ये स्वच्छता, भोजन, मुला मुलींची सुरक्षा, आरोग्य सुविधा यांची नियमित तपासणी करा, अशा सूचनाही  सदस्यांनी केल्या . डॉ.स्वाती देशमुख- पाटील यांच्यासह संबंधित अधिकाऱ्यांनी कुलवाडी कुळवाडी जात समूह आणि  विविध संवर्गांना वितरित केलेल्या जात वैधता प्रमाणपत्रांबाबत बैठकीत माहिती दिली.