महादेवी हत्तीण : मुख्यमंत्र्यांची वनताराच्या मुख्य कार्यकारी अधिकाऱ्यांशी चर्चा
मुंबई – काल नांदणी मठातील स्वामी, लोकप्रतिनिधी आणि मुख्यमंत्र्यांच्या प्रमुख उपस्थितीत महादेवी हत्तीण मठात परत आणण्याबाबत बैठक पार पडली. या बैठकीत राज्य सरकार सर्वोच्च न्यायालयात पुनरावलोकन याचिका दाखल करणार असल्याचा निर्णय घेण्यात आला आहे. त्यानुसार आज मुख्यमंत्री देवेंद्र फडणवीस यांनी वनताराच्या मुख्य कार्यकारी अधिकाऱ्यांशी चर्चा केली आहे.
महादेवी हत्तीण पुन्हा सुखरुप नांदणी मठाकडे परत देण्यासाठी महाराष्ट्र सरकारने जी याचिका करण्याचे ठरविले, त्यात सहभागी होण्याचा निर्णय वनताराने घेतला असल्याचे मुख्यमंत्र्यांनी म्हटले आहे.
या चर्चेदरम्यान त्यांनी आम्ही केवळ सर्वोच्च न्यायालयाच्या निर्णयाचे पालन केले आहे. महादेवी हत्तीणीचा ताबा घेण्याचा आमचा कुठलाही प्रयत्न नव्हता. कोल्हापूर जिल्ह्यातील नांदणी मठानजीक वन विभागाने निवडलेल्या जागेवर या महादेवी हत्तीणीसाठी पुनर्वसन केंद्र उभारण्यास राज्य सरकारला सर्वतोपरी मदत करण्याची तयारी वनताराने दर्शविली आहे. विविध समाजांच्या धार्मिक भावनांचा आम्ही सन्मानच करतो, असेही वनताराच्या अधिकाऱ्यांनी म्हटले आहे.