खाजगी लॅबला नमुने पाठवण्याच्या तक्रारीवरून सीपीआरमध्ये चौकशी समिती नियुक्त
कोल्हापूर – राजर्षी छत्रपती शाहू महाराज शासकीय वैद्यकीय महाविद्यालय आणि छत्रपती प्रमिलाराजे सर्वोपचार रुग्णालय (सीपीआर), कोल्हापूर येथे रुग्णांना रक्त तपासणीसाठी खाजगी लॅब मध्ये पाठवलं जात असल्याची गंभीर तक्रार पुढे आली आहे. ही घटना २७ नोव्हेंबर रोजी दुपारी तीनच्या सुमारास प्रसूतीशास्त्र विभागातील वॉर्डसमोर घडल्याची माहिती मिळाली. स्वाभिमानी संभाजी ब्रिगेडचे जिल्हाध्यक्ष रुपेश पाटील यांनी मोबाईलद्वारे ही तक्रार नोंदविल्यानंतर वैद्यकीय अधीक्षकांनी तत्काळ प्रशासनाला कारवाईसाठी पत्र पाठवले. अशा प्रकारच्या तक्रारी वारंवार होत असल्याने अधिष्ठाता डॉ. मल्लिकार्जुन यांनी तातडीने चौकशी समिती गठित करण्याचे आदेश दिले आहेत.
चौकशी समितीमध्ये समाविष्ट सदस्य :
१) डॉ. पवन खोत, प्राध्यापक व विभागप्रमुख, मनोविकृतीशास्त्र – अध्यक्ष
२) डॉ. भूषण मिरजे, वैद्यकीय अधीक्षक – सदस्य सचिव
3) डॉ. विद्या पाटील, सहयोगी प्राध्यापक, औषधवैद्यकशास्त्र – सदस्य
४) डॉ. राजेंद्र मदने, सहयोगी प्राध्यापक, शरीरविकृती – सदस्य
समितीने हा विषय प्राप्त झाल्यानंतर सात दिवसांच्या आत तपास पूर्ण करून अहवाल अधिष्ठात्यांना सादर करावा, असे आदेशात स्पष्ट नमूद करण्यात आले आहे.