फसवणूक प्रकरणी बेलीफला पाच दिवसांची पोलिस कोठडी
कोल्हापूर – क्रिप्टो करन्सीमध्ये गुंतवणुकीवर दाम दुप्पट परतावा देण्याचे आमिष दाखवून तीन कोटी रुपयांची फसवणूक करणारा इनव्हिजन ट्रेड एक्स प्रायव्हेट लिमिटेड कंपनीचा मुख्य सुत्रधार संशयित जितेंद्र मगदूम हा सहा महिन्यापासून पसार होता. शाहूपुरी पोलिसांनी त्याला शनिवारी सायंकाळी अटक केली होती. आज मगदूम याला न्यायालयात हजर केले असता न्यायालयाने त्याला पाच दिवसांची पोलीस कोठडी सुनावली आहे.
क्रिप्टो करन्सी शेअर मार्केटमध्ये गुंतवणूक करून दाम दुप्पट परतावा देण्याचे आमिष दाखवून दिंडनेर्ली येथील जितेंद्र मगदूम याच्यासह चेतन भोसले, अमोल कदम, सागर शेळके, अमित कोळापटे यांनी २०२१ साली इन व्हिजन ट्रेड एक्स प्रायव्हेट लिमिटेड या कंपनीची स्थापन केली होती.
या कंपनीच्या माध्यमातून त्यांनी गुंतवणूकदारांकडून मोठी रक्कम गोळा केली होती. सुरुवातीला काही काळ कंपनीकडून गुंतवणूकदारांना परतावा देण्यात आला. मात्र थोड्या दिवसातच परतावा देणं बंद केलं. फसवणूक झाल्याचे लक्षात येताच गुंतवणूकदारांनी संबंधितांविरोधात शाहुपुरी पोलिसांत तक्रार दिली. त्यानंतर संशयीतांविरोधात पोलिसात तीन कोटी रुपयांची फसवणूक झाल्याचा गुन्हा दाखल केला होता. या प्रकरणी पोलिसांनी यापूर्वी जून २०२५ मध्ये अमित कोळापटे, सागर शेळके, चेतन भोसले, अमोल कदम, नीता मगदूम यांना अटक केली होती. मात्र न्यायालयात बेलीफ म्हणून नोकरीला असलेला जितेंद्र मगदूम हा गेल्या सहा महिन्यापासून पसार होता. शनिवारी सायंकाळी शाहूपुरी पोलिसांनी मगदूम याला अटक केली. आज त्याला न्यायालयात हजर केले असता न्यायालयाने त्याला पाच दिवसांची पोलीस कोठडी सुनावली आहे.