कोल्हापूर – सर्वांच्या सहकाऱ्याने गोकुळचे म्हैस दूध उत्पादन वाढवून २५ लाख लिटर संकलनाचा टप्पा गाठणार असल्याचे प्रतिपादन वैद्यकीय शिक्षण व विशेष सहाय्य मंत्री हसन मुश्रीफ यांनी केले. गोकुळ दूध संघाच्यावतीने सुपरवायझर, महिला स्वयंसेविका तसेच सर्व विभाग प्रमुख यांची बैठक पार पडली यावेळी ते बोलत होते. 

यावेळी बोलताना मंत्री हसन मुश्रीफ म्हणाले कि, “मी स्वतः एक दूध उत्पादक शेतकरी आहे. दुग्ध व्यवसाय करताना ग्रामीण भागातील अडचणी जवळून अनुभवल्या आहेत. कोणतीही सहकारी संस्था मोठी व्हायची असेल, तर त्या संस्थेतील प्रत्येक घटकाने निष्ठेने आणि एकदिलाने काम केले पाहिजे. आपण ज्या संस्थेत काम करतो ती संस्था ‘एक नंबर’ व्हावी, हे आपले ध्येय असले पाहिजे.” 

 “वासरू संगोपन योजना तसेच आय.व्ही.एफ. संकल्पना अधिक प्रभावीपणे राबवण्यासाठी गोकुळ प्रयत्नशील आहे. आपण सर्वांनी एकत्रित प्रयत्न केले, तर २० लाखांचा कलश पूजन करून २५ लाख लिटर संकलनाचा टप्पा गाठणे शक्य आहे. तसेच पुढील एक-दोन वर्षांत परराज्यातील १० हजार जातिवंत म्हैशी गोकुळच्या माध्यमातून जिल्ह्यात आणण्याचा मानस आहे.” सीमाभागातील म्हैस दूध संकलन वाढवण्यासाठी संचालक मंडळाने प्रयत्न करावेत, तसेच प्रत्येक तालुक्यातील उत्कृष्ट कामगिरी करणाऱ्या सुपरवायझरचा ‘लाडका सुपरवायझर’ म्हणून गौरव केला जाईल, अशी घोषणा मा. मुश्रीफ यांनी केली.
          
याप्रसंगी माजी आमदार के.डी.सी.सी बँकेचे संचालक राजेश पाटील, संघाचे चेअरमन नविद मुश्रीफ, ज्येष्‍ठ संचालक विश्वास पाटील, अरुण डोंगळे, संचालक अजित नरके, शशिकांत पाटील–चुयेकर, किसन चौगले, रणजितसिंह पाटील, नंदकुमार ढेंगे, कर्णसिंह गायकवाड, संभाजी पाटील, प्रकाश पाटील, अमरसिंह पाटील, बयाजी शेळके, बाळासो खाडे, युवराज पाटील, राजेंद्र मोरे, संचालिका श्रीमती अंजना रेडेकर, कार्यकारी संचालक डॉ.योगेश गोडबोले, संघाचे अधिकारी व कर्मचारी उपस्थित होते.