भादोले गावात शर्यतीच्या बैलावर अन् मालकावर भानामतीचा प्रकार....
कोल्हापूर - हातकणंगले तालुक्यातील भादोले येथील स्मशानभूमीत शर्यतीच्या बैलावर आणि मालकावर भानामतीचा अघोरी प्रकार घडल्याचे उघडकीस आले आहे. त्यामुळे खळबळ उडाली आहे. आज स्मशानभूमीत रक्षाविसर्जनाचा कार्यक्रम असल्याने ग्रामस्थ मोठ्या संख्येने तेथे गेले असता हा धक्कादायक प्रकार त्यांच्या निदर्शनास आला. या घटनेमुळे गावासह संपूर्ण परिसरात भीतीचे वातावरण निर्माण झाले आहे. स्मशानभूमीतील एका ठिकाणी लोटक्याला लाल रंगाच्या दोराने कापडात घट्ट बांधण्यात आले होते. संशय आल्याने विकास अवघडे, आकाश अवघडे, उदय अवघडे, संजय अवघडे कोतवाल यांच्यासह ग्रामस्थांनी ते कापड उघडून पाहिले असता त्यामध्ये बाहुली,अस्थी,लिंबू, टाचण्या,हळद-कुंकू,गुलाल,काळे उडीद यासारखे साहित्य आढळून आले आहे. याशिवाय एका चिठ्ठीमध्ये परिसरातील ‘टॉप’ बैलांची नावे तसेच त्यांच्या मालकांची नावे स्पष्टपणे लिहिलेली असल्याचे दिसून आले आहे. या सर्व बाबींमुळे हा अघोरी प्रकार बैल शर्यतीतील वर्चस्व मिळवण्यासाठी अथवा प्रतिस्पर्ध्यांचे नुकसान करण्याच्या उद्देशाने केल्याचा संशय व्यक्त केला जात आहे.
या चिठ्ठीतील संबंधित बैल मालकांमध्ये तीव्र चिंता आणि भीतीचे वातावरण पसरले आहे. काही नागरिकांनी अशा अंधश्रद्धा आणि अघोरी कृत्यांचा तीव्र निषेध व्यक्त केला असून, दोषींवर कठोर कारवाईची मागणी केली आहे. या घटनेची माहिती मिळताच स्थानिक प्रशासन व पोलिसांना कळविण्यात आले असून पुढील तपासाची प्रक्रिया सुरू होण्याची शक्यता आहे. या अघोरी प्रकारामुळे ग्रामीण भागात अजूनही अंधश्रद्धेचे जाळे किती खोलवर रुजले आहे, हे पुन्हा एकदा अधोरेखित झाले आहे.