लाडकी बहिण योजनेबाबत आमदार सतेज पाटील यांनी विधिमंडळ अधिवेशनात उपस्थित केलं "हा" सवाल
नागपूर - आमदार सतेज पाटील यांनी विधानपरिषदेत मुख्यमंत्री माझी लाडकी बहिण योजनेसंदर्भात काही प्रश्न उपस्थित केले. राज्य शासनाच्या लाडकी बहीण योजनेत २६ लाख ३४ हजार महिला लाभार्थी अपात्र असून १४ हजार २९८ पुरुषांनी या योजनेचा लाभ घेऊन शासनाची सुमारे २१ कोटी ४४ लाख रुपयांची फसवणूक केलीय. ९ हजार५२६ शासकीय महिला कर्मचाऱ्यांनी गेल्या १० महिन्यात १४ कोटी ५० लाख रुपये नियमबाह्य पध्दतीने या योजनेतून मिळविल्याचे ऑगस्ट, २०२५ मध्ये निदर्शनास आले आहे. याकडे आमदार सतेज पाटील यांनी सभागृहाचे लक्ष वेधले. शासनाची फसवणूक करणाऱ्या अपात्र महिला, पुरुष लाभार्थी आणि शासकीय महिला कर्मचाऱ्यांकडून फसवणुकीची रक्कम वसूल करण्याबाबत शासनाने कोणती कार्यवाही केली आहे ? त्याचबरोबर या योजनेचे मासिक मानधन १५०० रुपयांवरून २१०० रुपये करण्याबाबत कोणती कार्यवाही करण्यात आलीय असे प्रश्न आमदार सतेज पाटील यांनी उपस्थित केले.
यावर उत्तर देताना महिला आणि बालविकास मंत्री अदिती तटकरे यांनी मुख्यमंत्री-माझी लाडकी बहिण" या योजनेचा सरकारी कर्मचाऱ्यांनी तसंच पुरुषांनी लाभ घेतल्याचे आढळल्यास त्यांच्याकडून वसुली करण्याबाबत निर्णय घेण्यात आला असल्याचे सांगितले. त्यानुसार संबंधित अधिकारी आणि कर्मचारी यांच्यावर महाराष्ट्र नागरी सेवा नियमातंर्गत आवश्यक ती कार्यवाही करुन त्यांच्याकडून वसुली करण्याबाबत संबंधित विभागांना कळवण्यात आल्याचे मंत्री तटकरे यांनी सांगितले.