कोल्हापूर – पुढील पिढी माणूस म्हणून चांगली निर्माण व्हावी. त्यासाठी परमाब्धिमध्ये सर्व मानवासाठी हितावह असे शाश्वत सत्यज्ञान सांगितले आहे. परमाब्धि आणि आपल्या इतरही सर्व ग्रंथांमध्ये विश्वमांगल्याचा विचार आहे. या ग्रंथांमध्ये सर्व जीवनावश्यक विषयांची व्याप्ती आहे, असे प्रतिपादन परमपूज्य परमात्मराज महाराज यांनी केले. ते निपाणी तालुक्यातील आडी येथील संजीवनगिरी मधील श्री दत्त देवस्थान मठाच्यावतीने दत्त जयंती निमित्ताने आयोजित परमाब्धिविचार महोत्सवाच्या दुसऱ्या दिवशीच्या प्रवचन कार्यक्रमात बोलत होते.

यावेळी सकाळी श्री दत्तगुरुचरणी अभिषेक अर्पण करून नित्यारती करण्यात आली. त्यानंतर नामजप, भजन आणि परमाब्धि पारायणात शेकडो भाविकांनी सहभाग घेतला होता. परमाब्धिविचार प्रवचनात परमाब्धी ग्रंथातील  व्याप्ती सांगताना परमपूज्य परमात्मराज महाराज पुढे म्हणाले, "जीवनावश्यक सर्व विषयांची तसेच धर्माविषयी सविस्तर ज्ञान परमाब्धिमध्ये आहे. यामध्ये सर्व विषयांची आणि सर्वांसाठी व्याप्ती आहे. जगातील सामान्यातील सामान्य जीवही आवश्यक आहे. माशा या सामान्य जीव असल्या तरी त्यांच्या एक लाख वीस हजाराहून जास्त जाती आहेत. जीन चा अभ्यास करण्यासाठी शास्त्रज्ञांना उपयोगी पडणाऱ्या काही माशा आहेत. रक्त ज्याप्रमाणे कृत्रिमरीत्या बनविता येत नाही, त्याप्रमाणे मधही बनविता येत नाही. नैसर्गिकरित्या मध मिळविण्यासाठी मधमाशांवर अवलंबून राहावे लागते. 

यावेळी अमित गुजर निपाणी, प्रणिता प्रकाश जडे कुंभोज, संगीता सुरेश मदकरी शिरगुप्पी, नीता गांगुली निपाणी, शुभांगी पाटील धामोड, महिला भजनी मंडळ सांगली आदी मान्यवरांचा परमपूज्य परमात्मराज महाराज व देवीदास महाराज यांच्या हस्ते शाल, श्रीफळ देऊन सत्कार करण्यात आला. यावेळी  आडी, बेनाडी, हंचिनाळ, कोगनोळी, हणबरवाडी, सौंदलगा, कागल, चिखली, हुपरी, रेंदाळ, निपाणी, कोल्हापूर, सांगली, पुणे, बेळगांव आदी परिसरातून तसेच कर्नाटक - महाराष्ट्र राज्यातून आलेल्या असंख्य भाविकांनी भजन, प्रवचन व महाप्रसादाचा लाभ घेतला.