वारसदार उमेदवारांना निवडणुकीत जनतेने पाडले तर...
केंद्रीय मंत्री नितीन गडकरी
मुंबई – "मला खूप वाईट वाटतं की २०-३० वर्षे काम करणारा कार्यकर्ता तिकीट मागतो त्यावेळी कोणीतरी मंत्री म्हणतो माझ्या बायकोला किंवा मुलाला तिकीट द्या. त्याचे तिकीट जाते. हे खूपच दुर्भाग्य पूर्ण आहे. पण याला कारण जनता आहे. कोणत्याही पक्षाचे असे वारसदार उमेदवार उभे राहतील त्यांना निवडणुकीत जनतेने पाडले तर ते लोक त्यांना उभे करणारच नाही, असे वक्तव्य केंद्रीय मंत्री नितीन गडकरी यांनी केले आहे.
सध्या राज्यात नगरपरिषद आणि नगरपंचायतीच्या निवडणुकीची रणधुमाळी सुरु असताना केंद्रीय मंत्री नितीन गडकरी यांनी केलेल्या या वक्तव्याने उलट – सुलट चर्चांना उधाण आले आहे.
अनेक महानगरपालिका आणि जिल्हा परिषद निवडणुकीत भाजपच्या निष्ठावान कार्यकर्त्यांना डावलून आमदार किंवा खासदारांच्या पत्नी, मुले किंवा जवळच्या नातेवाईकांना संधी देण्यात आली आहे. पक्षासाठी वर्षानुवर्षे काम करणाऱ्या कार्यकर्त्यांना डावलून ऐनवेळी आलेल्या किंवा नेत्यांच्या वशिल्याने तिकीट मिळालेल्या उमेदवारांमुळे अनेक ठिकाणी कार्यकर्त्यांमध्ये तीव्र नाराजी दिसून आल्याचे त्यांनी म्हटले आहे.