आता पोलीस मला अटक कधी करणार...: आ. निलेश राणे
मालवण – मालवणमध्ये पैसे वाटपावरून भाजप आणि शिंदे गट आमने – सामने आले आहेत. त्यात भर म्हणून पोलिसांनी शिंदे गटाचे आमदार निलेश राणे यांच्यावर गुन्हा दाखल केला आहे. त्यामुळे मोठी ठिणगी पडली आहे.
काही दिवसांपूर्वी आ. निलेश राणे यांनी भाजप कार्यकर्ता विजय केनवडेकर यांच्या घरावर धाड टाकली आणि नोटांचे बंडल सापडल्याचा दावा केला. विजय केनवडेकर यांच्या घरी निलेश राणेंनी स्टिँग ऑपरेशन केलं, तिथेच मंत्री नितेश राणे पोहोचले. यावेळी भाजपचे नेते नितेश राणेंनी केनवडेकरांच्या कुटुंबीयांशी संवाद साधला. या भेटीनंतर नितेश राणेंनी निलेश राणेंचे आरोप फेटाळले.यावरून दोघांच्यात चांगलीच जुंपली असताना पोलिसांनी आ. निलेश राणेंवर गुन्हा दाखल केल्याने मोठ्या वादाला तोंड फुटले आहे.
गुन्हा दाखल झाल्यावर आ. निलेश राणे यांनी म्हटले आहे कि, हे अपेक्षित होतं. ज्यांच्या घरात पैसे सापडले त्यांना साधी नोटीस देखील देण्यात आलेली नाही. मात्र, माझ्यावर गुन्हा दाखल करण्यात आलेला आहे. आम्ही गुन्हा पकडून दिला, हा आमचा गुन्हा झाला. ज्याने कॅमेरा पकडला होता त्यालादेखील आरोपी करण्यात आले आहे. हे सर्व दबावाखाली सुरु आहे, हे स्पष्ट दिसतंय. तुमच्या लोकांनी काही केलं तरी त्यांना मोकाट सोडलं जातं, सगळे अधिकार आहेत. चोरी करा, डाका टाका, पैसे उकळा, त्यांना सगळे अधिकार आहेत निवडणुकीत. अजून माझ्यावर दहा केसेस झाल्या तरी, मी पुढचे तीन दिवस यांना सोडणार नाही. आता पोलीस मला अटक कधी करणार, असा सवाल त्यांनी केलाय.