कॉम्रेड गोविंदराव पानसरेंच्या निवासस्थानी स्वातंत्र्याचे शिलेदार फलकाचे अनावरण...
कोल्हापूर - शहरातील प्रतिभानगरमध्ये ज्येष्ठ कामगार नेते कॉम्रेड गोविंद पानसरे यांच्या निवासस्थानाबाहेर 'स्वातंत्र्याचे शिलेदार गोविंद पंढरीनाथ पानसरे' या फलकाचे अनावरण खासदार शाहू महाराज छत्रपती आणि कॉम्रेड दिलीप पवार यांच्या हस्ते करण्यात आले.
यावेळी उमा पानसरे यांची प्रमुख उपस्थिती होती. यावेळी बोलताना खासदार शाहू महाराज छत्रपती यांनी, सरकार पानसरेंच्या पुरोगामी विचारांच्या विरुध्द वागत असल्याचा आरोप केला. कॉम्रेड पानसरे यांनी राजर्षी छत्रपती शाहू महाराज यांचे विचार पुढे नेले, सर्वसामान्यांसाठी ते झगडत राहिले. मात्र, दहा वर्षे झाली तरी त्यांचे खुनी का सापडत नाहीत ? असा सवाल उपस्थित करून हा मुद्दा आपण संसदेत मांडणार असल्याचे खासदार शाहू महाराज छत्रपती यांनी सांगितले.
यावेळी शिवसेना उद्धव बाळासाहेब ठाकरे पक्षाचे सहसंपर्कप्रमुख विजय देवणे, राष्ट्रवादी काँग्रेस शरदचंद्र पवार पक्षाचे जिल्हाध्यक्ष व्ही. बी. पाटील, कार्याध्यक्ष अनिल घाटगे, शेकापचे भाई बाबूराव कदम, कॉम्रेड अतुल दिघे, शिक्षक नेते भरत रसाळे, दलितमित्र व्यंकापा भोसले, भाकपचे कॉम्रेड रघुनाथ कांबळे, कॉम्रेड सतीशचंद कांबळे, रवी जाधव, उदय धारवाडे, अनिल चव्हाण, स्मिता पानसरे-सातपुते, वासुदेव कुलकर्णी, गीता पाटकर, बन्सी सातपुते आदी उपस्थित होते.