माजी आमदार मानसिंगराव नाईकांचा मास्टरस्ट्रोक...भाजपला धक्का देत अनेकांनी केला पक्ष प्रवेश
कोल्हापूर - शिराळा तालुक्यातील चिखली येथे आज भाजपाला जोरदार धक्का देत माजी नगरसेवक अभिजित नाईक, माजी जिल्हा परिषद सदस्य वैशाली नाईक यांच्यासह विक्रमसिंह नाईक, गायत्री नाईक यांनी राष्ट्रवादी काँग्रेस पक्षात प्रवेश केला आहे. माजी आमदार मानसिंगराव नाईक यांच्या पुढाकाराने हा पक्ष प्रवेश झाल्याने मानसिंगराव नाईक यांनी विरोधकांना चांगलाच मास्टर स्टोक दिला आहे. यावेळी त्यांनी शेकडो कार्यकर्त्यांच्या उपस्थितीत त्यांचे जंगी स्वागत केले.
या प्रवेशावेळी तालुक्याचे माजी सभापती सम्राटसिंग नाईक व विराज उद्योग समूहाचे अध्यक्ष विराज नाईक यांनी शाल, श्रीफळ व पुष्पगुच्छ देवून स्वागत केले. माजी आमदार मानसिंगराव नाईक यांनी, शिराळ्यातील जनतेने आमच्यावर सातत्याने विश्वास दाखवला आहे. त्यांना पाईक राहून मी सातत्याने शिराळा शहराच्या विकासात भर टाकली आहे. अनेक सोई-सुविधा निर्माण केल्या आहेत. आतापर्यंत इतर कोणत्याही राजकीय मंडळीने शिराळ्याच्या विकासात माझ्याएवढे योगदान दिलेले नाही. सर्व कार्यकर्त्यांना पुन्हा एकदा ताकद दाखविण्याची व शिराळकरांचा विश्वास संपादन करण्याची जबाबदारी आहे. हेवेदावे बाजूला ठेवून एकसंध पणे काम केल्यास विरोधकांना एकही जागा जिंकता येणार नाही, असा विश्वास त्यांनी व्यक्त केला.
यावेळी विश्वासचे संचालक विश्वास कदम, माजी सरपंच प्रमोद नाईक, विवेक नाईक, दूध संघाचे संचालक भूषण नाईक, माजी सरपंच देवेंद्र पाटील, अजय जाधव, माजी जि. प. सदस्य प्रवीण शेटे व महादेव कदम, राष्ट्रवादी शिराळा शहर अध्यक्ष सुनील कवठेकर यांच्यासह शिराळा शहरातील अनेक मान्यवर, आजी, माजी पदाधिकारी, व्यापारी, युवक, राष्ट्रवादी काँग्रेसचे पदाधिकारी, माजी नगरसेवक, माजी उपसरपंच, ग्रामपंचायत सदस्य आदी उपस्थित होते.