मनशक्तीसारख्या संस्थांची मानव कल्याणासाठी गरज - शुभांगी गावडे
कोल्हापूर – मनशक्ती केंद्र व्यापक संशोधनातून व्यक्ती विकासातून राष्ट्र आणि मानव कल्याणासाठी जे काम करत आहे त्याची समाजाला गरज असल्याचे प्रतिपादन प्राचार्या शुभांगी गावडे यांनी केले.
मनशक्ती प्रयोग केंद्र लोणावळा, श्री स्वामी विवेकानंद शिक्षण संस्था, यांच्या सहकार्याने यश शांती साठी न्यू वे हा दोन दिवसीय उपक्रम आयोजित करण्यात आला होता. यावेळी त्या बोलत होत्या.
यावेळी बोलताना संस्थेच्या सचिव प्राचार्या शुभांगीताई गावडे म्हणाल्या,मनशक्ती प्रयोग केंद्राचे उपक्रम विद्यार्थी, पालक, शिक्षक यासह समाजातील सर्व घटकांसाठी उपयुक्त आहेत. सध्याच्या काळात तंत्रस्नेही गरजेचे असले तरी तंत्रज्ञानाच्या आहारी जाणे धोकादायक आहे. त्यामुळे संवेदनशील , कार्यक्षम, सृजनशील पिढी घडवण्यासाठी योग्य वयात संस्कार होणे गरजेचे आहे.
विवेकानंद महाविद्यालयाचे प्राचार्य डॉ. रमेश कुंभार यांनी, जीवनात यशस्वी होण्यासाठी मनाची शक्ती वाढवण्याची गरज असून मनशक्तीचे उपक्रम त्यासाठी उपयुक्त असल्याचे म्हटले आहे.
मनशक्तीचे कार्यकारी विश्वस्त प्रमोदभाई शिंदे यांनी. स्वामी विज्ञानानंद मनशक्ती व्यक्ती, कुटुंबं, राष्ट्र मानवता कल्याणासाठी सशक्त, सुसंस्कारी पिढी घडवण्याचे काम करत असल्याचे सांगितले. यावेळी मनशक्तीचे जीवनदानी साधक सुहास गुधाटे यांनी सूत्रसंचालन केले तर गीतेश कुलकर्णी यांनी आभार मानले.