कोल्हापूर – भविष्यात प्रशासनातील अधिकाऱ्यांनी योग्य नियोजन करून राज्याला पुढे नेण्याचे काम करणे गरजेचे असल्याचे प्रतिपादन आ. सतेज पाटील यांनी केले. कसबा बावड्यातील पोलीस लाईन बॉईज ग्रुपच्यावतीनं स्पर्धा परीक्षेत यश संपादन केलेल्या गुणवंतांचा सत्कार सोहळा आयोजित करण्यात आला होता. यावेळी ते बोलत होते.

यावेळी  आमदार सतेज पाटील यांच्या हस्ते राजपत्रित अधिकारी वर्ग एक परीक्षेत राज्यात मागासवर्गीय गटात द्वितीय क्रमांक मिळवलेल्या सायली भोसले, प्रियांका सावंत, जान्हवी पावसकर आणि सहायक समाज कल्याण अधीक्षक स्नेहल ठाणेकर यांचा मानपत्र, शाल, श्रीफळ आणि पुष्पगुच्छ देऊन सत्कार करण्यात आला. सायली भोसले, प्रियांका सावंत, आणि स्नेहल ठाणेकर यांनी आपलं मनोगत व्यक्त करत संयोजकांचे आभार मानले आणि प्रामाणिकपणे सेवा करण्याची ग्वाही दिली.

यावेळी बोलताना आमदार सतेज पाटील यांनी, राज्याच्या प्रशासनात कोल्हापूरच्या लेकी आता सहभागी होत आहेत याचा मनस्वी आनंद होत असल्याचं सांगितलं. राज्यकर्ते हे कायदा करत असले तरी त्याची अंमलबजावणी हे प्रशासन करत असतं. सुदैवानं आज देखील इतर राज्यांच्या तुलनेत महाराष्ट्राचं प्रशासन चांगली कामगिरी करतय पुढील काळ हा आव्हानांचा असणार आहे, त्यामुळं प्रशासनातील अधिकाऱ्यांनी देखील योग्य नियोजन करून शासकीय धोरणांची पूर्तता वेळेत करत राज्याला पुढं नेण्याचं काम केलं पाहिजे असे त्यांनी सांगितले.

यावेळी बोलताना गृह विभागाचे पोलीस उपाधीक्षक तानाजी सावंत यांनी, किरण भोसले यांनी पोलीस खात्यात प्रामाणिक सेवा केली मुलांवर संस्कार केले त्यामुळंच आज सायलीनं मोठ यश मिळवलं असल्याचं सांगितले.

या कार्यक्रमाला माजी महापौर स्वाती येवलुजे, पोलीस निरीक्षक किरण भोसले, सेवानिवृत्त सहाय्यक फौजदार विलास पाटील, सागर यवलुजे,मोहन गोखले, उत्तम रंगापुरे, अबू शेख, सुनील पवार, संतोष पवार, नंदकुमार वंजी, राजू कोणीरे यांच्यासह पोलीस लाईन बॉईज ग्रुपचे सदस्य उपस्थित होते.