शिरोळ तालुका कोणाच्या बापाचा असल्यासारखं गृहीत धरू नये : राजू शेट्टींची टीका
कोल्हापूर - स्थानिक स्वराज्य संस्थेच्या माध्यमातून जनतेला सुविधा देण्यापेक्षा काही लोकांनी दुकानदारी उघडून ठेवली होती ती दुकानदारी मोडीत काढण्याचा आमचा प्रयत्न आहे, शिरोळ तालुका कोणाच्या बापाचा असल्यासारखं कोणीही गृहीत धरू नये, असा हल्लाबोल माजी खासदार राजू शेट्टी यांनी आ. राजेंद्र पाटील - यड्रावकर यांचे नाव न घेता केला.
आज नगरपरिषदेच्या निवडणुकीसाठी इंडिया आघाडी, महाविकास आघाडी आणि स्वाभिमानी शेतकरी संघटनेची बैठक पार पडली. यावेळी ते माध्यमांशी बोलत होते.
राजू शेट्टी यांनी म्हटले कि, पक्षीय मतभेद बाजूला ठेवून केवळ शहराच्या विकासासाठी महाविकास आघाडी आणि स्वाभिमानी शेतकरी संघटना एकत्र आली आहे. विकास कामांच्या नावाखाली जयसिंगपूरमध्ये अनेक वेळा भ्रष्टाचार झाला आहे आणि तो आम्ही उघडकीस आणण्याचा प्रयत्न केला आहे. शहरात प्रॉपर्टी कार्डच्या नावाखाली अनेक निवडणुका त्यांनी जिंकल्या आहेत मात्र आता जनता त्यांच्यावर विश्वास ठेवणार नाही.