बाटलीतून पेट्रोल विकताय...
मग ही बातमी वाचाच
कोल्हापूर : जिल्ह्यातील सर्व पेट्रोल व डिझेल पंप चालकांनी बाटलीतून किंवा असुरक्षित कंटेनरमधून पेट्रोल देणे तात्काळ बंद करावे, अन्यथा कायदेशीर कारवाई करण्यात येईल, असा इशारा जिल्हाधिकारी अमोल येडगे यांनी दिला आहे.
बाटल्या, कॅन किंवा इंधन साठवण्यासाठी अप्रमाणित कंटेनरमधून इंधनाची विक्री व वितरण करणे हे धोकादायक आणि निषिद्ध असल्याचे त्यांनी स्पष्ट केले आहे. पेट्रोल पंपांवर तात्काळ या बंदीची अंमलबजावणी करण्यात यावी, असे निर्देश जिल्हा प्रशासनाने दिले आहेत.
विक्री अधिकाऱ्यांना आपल्या कार्यक्षेत्रातील सर्व पेट्रोल पंपांची तपासणी करून नियमांचे पालन होत आहे का याची खात्री करण्याचे आदेश देण्यात आले आहेत. नियमांचे उल्लंघन आढळल्यास संबंधित पंप चालकांना कारणे दाखवा नोटीस देण्यात येईल आणि आवश्यकतेनुसार कठोर प्रशासकीय तसेच कायदेशीर कारवाई करण्यात येईल.
ग्राहक व नागरिकांना याबाबत जागरूक करण्यासाठी सर्व पेट्रोल पंपांनी पंप परिसरात “बाटलीतून पेट्रोल विक्री निषिद्ध” अशा स्पष्ट सूचनाफलकाचे प्रदर्शन करावे, असेही जिल्हाधिकारी येडगे यांनी सांगितले.