संगीतसूर्य केशवराव भोसले नाट्यगृह परिसरातील अतिक्रमणावर कारवाई...
कोल्हापूर - शहरातील संगीतसूर्य केशवराव भोसले नाट्यगृहाच्या परिसरातील महापालिकेच्या मालकीचे गाळे अतिक्रमण विभागाने जमीनदोस्त केले आहेत. न्यायालयाच्या आदेशानुसार ही कारवाई करण्यात आल्याची माहिती महानगर पालिकेच्या सहाय्यक आयुक्त स्वाती दुधाने यांनी दिली आहे.
कोल्हापुरातील संगीतसूर्य केशवराव भोसले नाट्यगृहाच्या परिसरात अनेक वर्षांपूर्वी महापालिकेच्या मालकीचे चौदा गाळे उभारण्यात आले होते. या गाळ्यामुळे नाट्यगृहाचा परिसर संकुचित झाला होता, तसेच सुरक्षेचा प्रश्न देखील निर्माण झाला होता. नाट्यगृहाच्या सुरक्षेसाठी आणि भविष्यातील विकासासाठी या अतिक्रमणावर कारवाई करण्याचा निर्णय महापालिकेने घेतला आहे. संबंधित गाळेधारकांना महापालिकेने नोटीस बजावली होती. मात्र, त्यांनी न्यायालयाचा दरवाजा ठोठावला होता. आज न्यायालयाच्या आदेशानुसार सकाळी महापालिकेच्या अतिक्रमण विभागाने कारवाई करत सर्व गाळे जमीनदोस्त करून परिसर मोकळा केला आहे.