कोल्हापूर शहरानंतर आता गगनबावड्यात बिबट्याचा धुमाकूळ... बैलावर केला हल्ला
कोल्हापूर - कोल्हापूर शहरात काल मंगळवारी मध्यवस्तीत बिबट्या घुसल्याने एकच खळबळ उडाली होती. या बिबट्याला पकडण्यात वन विभागाला यश आले. ही घटना ताजी असतानाच आता गगनबावडा तालुक्यातील अणदूर येथे बिबट्या धुमाकूळ घालत आहे. या बिबट्याने अणदूर येथील स्थानिक
शेतकरी विठ्ठल शेळके यांच्या पाळीव बैलावर हल्ला करून ठार केले आहे. विठ्ठल शेळके यांनी त्यांचा बैल अणदूर गावातील कावळटेक परिसरात चरण्यासाठी सोडला होता. त्या बैलावर बिबट्याने हल्ला करून त्याला ठार केले आहे. या घटनेनंतर वनविभागाने कावळटेक जंगलांमध्ये ट्रॅप कॅमेरे बसवले होते. या कॅमेरात हा बिबट्या दिसून आला आहे. बिबट्याच्या वावरामुळे येथील स्थानिक शेतकऱ्यांमध्ये भीतीचे वातावरण पसरत आहे.