आता एप्रिलपासून कर्ज फक्त सोन्यावरच नाहीतर चांदीवरही...
आरबीआयने कर्ज घेण्यासाठी दिला नवा पर्याय...
नवी दिल्ली – आतापर्यंत सोन्यावरच कर्ज घेता येत होतं पण आता चांदीवरही कर्ज घेता येणार आहे. त्यामुळे कर्ज घेणाऱ्यांची चिंता मिटली आहे. भारतीय रिझर्व्ह बँकेने नागरिकांना कर्ज घेण्यासाठी नवीन पर्याय उपलब्ध केला आहे. त्यानुसार मार्गदर्शक तत्त्वेही जाहीर केली आहेत. ही तत्त्वे 1 एप्रिल 2026 पासून देशभरात लागू होणार आहे.
आरबीआयच्या नियमानुसार, कमर्शियल बँका, स्मॉल फायनान्स, रीजनल रूरल बँका, अर्बन आणि रूरल को-ऑपरेटिव्ह बँका सोनं आणि चांदी या दोन्ही मौल्यवान धातूंवर कर्ज देवू शकणार आहेत. मात्र, गोल्ड ETF, म्युच्युअल फंड युनिट्स यावर कर्ज मिळणार नाही. तसेच मर्यादेपेक्षा जास्त वजनाच्या मौल्यवान वस्तूंवर कर्ज मिळणार नाही. सोन्याचे दागिने 1 किलोपर्यंत, चांदीचे दागिने 10 किलोपर्यंत, सोन्याची नाणी 50 ग्रॅमपर्यंत, चांदीची नाणी 500 ग्रॅमपर्यंत या मर्यादेपेक्षा जास्त वजनाच्या मौल्यवान वस्तूंवर कर्ज मिळणार नाही.