ज्येष्ठ अभिनेते धर्मेंद्र यांच्या प्रकृतीबाबत टीमकडून निवेदन जाहीर
मुंबई – कालपासून ज्येष्ठ अभिनेते धर्मेंद्र यांच्या प्रकृतीबाबत चिंता व्यक्त केली जात होती. यावर सोशल मिडीयावर त्यांचे निधन झाल्याची बातमी फिरू लागल्याने त्यांच्या कुटुंबीयांसह अनेकांनी संताप व्यक्त केला होता. परंतु त्यांची तब्येत आता सुधारत आहे. त्यामुळे त्यांना आता डिस्चार्ज देण्यात आल्याचे त्यांच्या टीमने निवेदनाव्दारे म्हटले आहे.
अभिनेते धर्मेंद्र यांच्यावर उपचार करणारे डॉ. प्रतीक समदानी यांनी म्हटले आहे की, "त्यांच्यावर बऱ्याच काळापासून माझ्याकडून उपचार सुरू आहेत. त्यांना आता रुग्णालयातून डिस्चार्ज देण्यात आला आहे, पण, त्यांच्यावर इथून पुढचे उपचार आता घरी सुरू राहतील..."
तसेच धर्मेंद्र यांच्या टीमने जाहीर केलेल्या निवेदनात म्हटले आहे की, "धर्मेंद्र यांना रुग्णालयातून डिस्चार्ज देण्यात आला आहे आणि ते घरीच उपचार करतील. आम्ही माध्यमांना आणि चाहत्यांना विनंती करतो की, त्यांनी या काळात कोणत्याही प्रकारच्या अफवांपासून दूर रहावं आणि त्यांच्या कुटुंबाच्या गोपनीयतेचा आदर करावा. त्यांच्या प्रकृतीत सुधारणा, उत्तम आरोग्य आणि दीर्घायुष्यासाठी आम्ही सर्वांचं प्रेम, प्रार्थना आणि शुभेच्छांचे आभार मानतो. कृपया त्यांचा आदर करा कारण ते तुमच्यावर प्रेम करतात..."