धक्कादायक: "आध्यात्मिक शक्ती" व "अंगात येण्याचा" दावा करून आयटी दाम्पत्याची १४ कोटींची फसवणुक
पुणे – कोथरूडमधील आयटी दाम्पत्याला मुलीवरील उपचाराचे आमिष दाखवत तब्बल १४ कोटी ३९ लाखांची फसवणूक केल्याचा धक्कादायक प्रकार समोर आला आहे. या प्रकरणी वेदिका पंढरपुरकर, तिचा पती कुणाल पंढरपुरकर आणि दीपक खडके या तिघांना अटक करण्यात आली आहे. आतापर्यंत ५४ लाख रुपये जप्त करण्यात आले आहेत. आरोपींच्या ३९ बँक खात्यांमधून १,१३९ संशयास्पद व्यवहार आढळले आहेत. तसेच, फसवणुकीतून मिळवलेले सोने खासगी सावकारांकडे गहाण ठेवून ६० लाख रुपयांचे कर्ज घेतल्याचेही तपासात समोर आले आहे.
आरोपींनी दाम्पत्याला "आध्यात्मिक शक्ती" व "शंकर महाराजांच्या अंगात येण्याचा" दावा करून संपत्ती विकायला भाग पाडले आणि पैसे उकळले. गुन्ह्यात वेदिकाच्या आई आणि भावावरही फसवणुकीसंदर्भात गुन्हा दाखल करण्यात आला आहे. आरोपींना ३ डिसेंबरपर्यंत पोलिस कोठडी सुनावण्यात आली असून, तपास सुरू आहे. पोलिसांनी आरोपींकडून वाहने, लॅपटॉप आणि इतर मालमत्ता जप्त केल्या आहेत, तसेच पैशांचा वापर कुठे केला गेला याची चौकशी सुरु आहे.