कोल्हापुरातील दूरसंचार विभागाचे जुने कार्यालय चोरट्यांनी फोडले...
सव्वा दोन लाखाचे साहित्य लंपास
कोल्हापूर – कोल्हापुरातील दूरसंचार विभागाचे जुने कार्यालय चोरट्यांनी फोडले आहे. त्यामुळे शहरात खळबळ उडाली आहे.
शहरातील न्यू शाहूपुरी परिसरातल्या वायल्डर मेमोरियल चर्चच्या शेजारी दूरसंचार विभागातील अधिकारी कर्मचाऱ्यांची कॉलनी आहे. या कॉलनी शेजारी दूरसंचार विभागाचे सध्या बंद असलेले जुने कार्यालय आहे. बुधवारी मध्यरात्री अज्ञातांनी या बंद कार्यालयाच्या गेटचे कुलूप तोडून कार्यालयात प्रवेश केला. या कार्यालयातील टेबल खुर्च्या, कपाटं आणि इतर साहित्य असे सुमारे सव्वा दोन लाख रुपयांचे साहित्य लंपास केले आहे.
या प्रकरणी दूरसंचार विभागाचे कनिष्ठ लिपिक डी एस कांबळे यांनी दिलेल्या फिर्यादीवरून अज्ञाता विरोधात शाहूपुरी पोलिसांत गुन्हा दाखल करण्यात आला आहे.