सांगली - भविष्य निर्वाह निधीच्या मंजूर पाच लाख रुपयांच्या प्रस्तावाची कागदपत्रे कोषागार कार्यालयाकडे पाठवून देण्यासाठी दोन हजार रुपयांची लाच स्वीकारताना सांगली जिल्हा परिषदेच्या वित्त विभागातील दोन अधिकाऱ्यांना गुरुवारी लाचलुचपत प्रतिबंधक विभागाच्या (एसीबी) पथकाने रंगेहात पकडले. या घटनेने जिल्हा परिषदेत खळबळ उडाली आहे. पूजन विलास भंडारे (३१, वरिष्ठ सहाय्यक लेखा अधिकारी, रा. जुना स्टॅण्ड रोड, कासेगाव, ता. वाळवा) आणि निखिल राजीव कांबळे (३५, कनिष्ठ सहाय्यक लेखा अधिकारी, रा. माता सावित्रीबाई फुले सोसायटी, नांदणी रोड, जयसिंगपूर).
दोघांविरोधात विश्रामबाग पोलिस ठाण्यात भ्रष्टाचार प्रतिबंधक अधिनियमानुसार गुन्हा दाखल करण्यात आला आहे.

तक्रारदार हे शासकीय कर्मचारी असून त्यांच्या भविष्य निर्वाह निधीतील पाच लाख रुपयांचा प्रस्ताव मंजूर झाला होता. मात्र, हा प्रस्ताव पुढील कार्यवाहीसाठी कोषागाराकडे पाठवला जात नव्हता. गुरुवारी भंडारे यांनी ‘पैशांशिवाय काम होत नाही’ असे सांगत तक्रारदारांकडे लाच मागितली. तक्रारदारांनी लगेचच एसीबीकडे तक्रार नोंदवली. पडताळणीत भंडारे यांनी २,५०० रुपयांची लाच मागितल्याचे आणि निखिल कांबळे यांनीही तक्रारदाराला लाच देण्यासाठी प्रवृत्त केल्याचे निष्पन्न झाले. गुरुवारी दुपारी एसीबी पथकाने जिल्हा परिषद भविष्य निर्वाह निधी विभागात सापळा रचला. तक्रारदाराकडून दोन हजार रुपयांची रक्कम स्वीकारताच भंडारे यांना रंगेहात पकडण्यात आले. त्याचवेळी कनिष्ठ सहाय्यक कांबळे यांना देखील कार्यालयातून ताब्यात घेण्यात आले.

कारवाईत उपअधीक्षक यास्मिन इनामदार यांच्या मार्गदर्शनाखाली निरीक्षक किशोरकुमार खाडे व अंमलदार प्रीतम चौगुले, अजित पाटील, उमेश जाधव, चंद्रकांत जाधव, पोपट पाटील, ऋषिकेश बडणीकर, धनंजय खाडे, सुदर्शन पाटील, सलीम मकानदार, रामहरी वाघमोहे, अतुल मोरे, सीमा माने, वीणा जाधव यांनी सहभाग घेतला.