अथर्व दौलत साखर कारखाना गाळप हंगाम २०२५-२६ ची यशस्वी सुरुवात
हलकर्णी - अथर्व दौलत साखर कारखान्याने २०२५-२६ च्या गाळप हंगामाची यशस्वी सुरुवात केली. या प्रसंगी कारखान्यातील पहिल्या पाच साखरेच्या पोत्यांचे पूजन चेअरमन मानसिंग खोराटे यांच्या हस्ते पार पडले.
अनेक अडचणींना सामोरे जाऊन शेतकरी आणि वाहतूकदारांचे नुकसान होऊ नये म्हणून कारखान्याने सर्व तांत्रिक आणि यांत्रिक तयारी पूर्ण केली आहे. सध्या कारखान्याकडे स्थानिक व बीड मिळून एकूण ५११ वाहतूक यंत्रणा कार्यरत आहेत. कारखान्याने ऊस उत्पादक शेतकऱ्यांचा ऊस वेळेत तोडण्यासाठी आणि वन्य प्राण्यांमुळे नुकसान झालेला ऊस प्राधान्याने उचलण्याचे नियोजन केले आहे.
यावेळी चेअरमन खोराटे यांनी शेतकरी, कंत्राटदार, अधिकारी, कर्मचारी आणि कारखान्याचे हितचिंतक यांचे आभार मानले व सर्वांच्या सहकार्याने हा हंगाम यशस्वी होईल असा विश्वास व्यक्त केला.
या कार्यक्रमाला कारखान्याचे मुख्य कार्यकारी अधिकारी विजय मराठे, टेक्निकल जीएम काशिनाथ शेटे, जनसंपर्क अधिकारी दयानंद देवान, कामगार कल्याण अधिकारी अश्रू लाड, सुरक्षा अधिकारी संभाजी साळुंखे, तसेच सर्व अधिकारी व कर्मचारी उपस्थित होते.