वादाचा शेवट, समाधानाचा प्रारंभ – दौलत अथर्व साखर कारखाना पुन्हा गतीत!
हलकर्णी - चंदगडमधील दौलत-अथर्व साखर कारखाना पुन्हा सुरू होण्याचा मार्ग मोकळा झाला आहे. कामगार आणि प्रशासन यांच्यात सुरू असलेला वाद अखेर मिटला आहे.
दौलत-अथर्व साखर कारखान्याच्या कामगारांनी वेतनवाढ आणि बोनस यांसाठी आंदोलन सुरू केल्याने कारखाना कालपासून बंद होता. मात्र, आज आमदार शिवाजीराव पाटील यांच्या अध्यक्षतेखाली झालेल्या बैठकीत दोन्ही बाजूंमध्ये सर्वमान्य तोडगा निघाला. कारखाना प्रशासनाने २०१९ ते २०२४ या कालावधीसाठी १२ टक्के वेतनश्रेणी आणि २०२४ ते २०२९ या कालावधीसाठी १० टक्के वेतनश्रेणी लागू करण्यास मान्यता दिली आहे. हलता महागाई भत्ता चार टप्प्यांत लागू केला जाणार आहे. यासोबतच यंदाचा बोनसही कामगारांना देण्याचे चेअरमन मानसिंग खोराटे यांनी मान्य केले आहे. तसेच कामगारांवरील केसेस आणि बडतर्फीच्या नोटिसा मागे घेण्याचे ठरले आहे. कामगार नेते प्रदीप पवार यांनी तोडगा मान्य करत उद्यापासून सर्व कामगार शिफ्टवर रुजू होतील, असे जाहीर केले.
या तोडग्यानंतर आता दौलत साखर कारखाना पुन्हा सुरू होणार असून, शेतकरी आणि कामगार दोघांनाही दिलासा मिळाला आहे. गाळप हंगाम यशस्वी करण्यासाठी कामगारांनी तयारी सुरू केली आहे.