पुणे-बंगळूर राष्ट्रीय महामार्गावर तणाव : शिवसैनिकांसह खा. धैर्यशील मानेंना कर्नाटक पोलिसांनी अडवलं...
कोल्हापूर – आज कर्नाटक राज्याच्या स्थापना दिनानिमित्त सीमाभागात 'काळा दिवस' पाळला जातो यासाठी आज ठाकरेंच्या शिवसैनिकांसह खासदार धैर्यशील माने हे बेळगावकडे निघाले होते. यावेळी कर्नाटक पोलिसांनी त्यांना अडवले त्यामुळे पुणे-बंगळूर राष्ट्रीय महामार्गावर काही काळ तणावाची परिस्थिती निर्माण झाली होती.
कर्नाटक प्रशासनाने महाराष्ट्र-कर्नाटक सीमेवरील कोगनोळी टोल नाका रोखला आहे. यावेळी खासदार माने यांनी तीव्र आक्षेप घेत, "मी एका संवैधानिक पदावर आहे आणि मला एका राज्यातून दुसऱ्या राज्यात जाण्याचा पूर्ण अधिकार आहे. अशाप्रकारे आम्हाला कोणीही रोखू शकत नाही," असे ठामपणे सांगत माने यांनी महामार्गावरच ठिय्या आंदोलन सुरू केले.
यावेळी खासदार धैर्यशील माने यांनी कर्नाटक प्रशासनाच्या या कृतीला 'दडपशाही' म्हणत तीव्र निषेध नोंदवला आहे."जोपर्यंत मराठी भाषिकांचा हा लढा यशस्वी होत नाही, तोपर्यंत आम्ही लढत राहू," असा निर्धारही त्यांनी यावेळी व्यक्त केला. अखेरीस, वाढता तणाव पाहता पोलिसांनी खासदार माने यांना ताब्यात घेतले आहे.