कोल्हापुरात जादूटोणा केल्यास थेट कारवाई होणार..!
जादूटोणा विरोधी कायद्याची प्रभावी अंमलबजावणी करावी : जिल्हाधिकारी
कोल्हापूर – अघोरी कृत्यांसारखे प्रकार कोल्हापूरसाठी भूषणावह नाही. असे प्रकार रोखण्यासाठी एक महिन्याची विशेष जनजागृती मोहीम राबवून थेट कारवाईची मोहीम हाती घ्या, घटना घडल्यानंतर कारवाईपेक्षा, गावागावांमध्ये अशा घटना रोखल्या पाहिजेत, अशा सूचना जिल्हाधिकारी अमोल येडगे यांनी दिल्या आहेत.
कोल्हापूर जिल्हाधिकारी कार्यालयात आज जिल्हाधिकारी अमोल येडगे यांच्या अध्यक्षतेखाली जिल्हास्तरावरील जादूटोणा विरोधी कायदा जनजागृती प्रचार आणि प्रसार कार्यक्रम अंमलबाजवणी समितीच्या बैठकीचे आयोजन करण्यात आले होते. या बैठकीत जिल्ह्यातील वाढत्या जादूटोणाच्या घटना आणि तक्रारींबाबत चर्चा झाली. पोलीस विभागाने दोन प्रकरणांमध्ये केलेल्या जलद तपासाबद्दल जिल्हाधिकारी येडगे यांनी विभागाचे अभिनंदन केले.
गावातील पोलीस पाटील, सरपंच आणि ग्रामसेवकांना याबाबत पत्र देऊन अशा घटनांची माहिती पोलीस विभागाला तातडीने कळवण्यास सांगावे, प्रत्येक शहरातील महत्त्वाच्या ठिकाणी आणि गावातील ग्रामपंचायतींच्या कार्यालयांमध्ये पोस्टर लावून माहिती तसेच तक्रार देण्यासाठी ११२ क्रमांकावर संपर्क साधण्याचे आवाहन करावे, अशा सूचना जिल्हाधिकाऱ्यांनी बैठकीत दिल्या आहेत.