सांगशी परिसरात बिबट्याचा धुमाकूळ; पाच शेळ्यांवर हल्ला
गगनबावडा – सांगशी (ता. गगनबावडा) परिसरात बिबट्याने धुमाकूळ घातल्याने ग्रामस्थांमध्ये भीतीचे वातावरण निर्माण झाले आहे. दोन दिवसांत बिबट्याने एकूण पाच शेळ्यांवर हल्ला केला आहे.
बुधवारी अनिल पडवळ व बाबासो कांबळे यांच्या प्रत्येकी एका शेळीवर हल्ला झाला. गुरुवारी सायंकाळी साडेपाचच्या सुमारास हरिजन वसाहतीजवळ मालोजी कांबळे यांच्या दोन आणि बाबासो कांबळे यांची एक शेळी बिबट्याने नेली. यातील एक शेळी मृतावस्थेत सापडली असून उर्वरित चार बेपत्ता आहेत.
घटनेची माहिती मिळताच गगनबावडा वनरक्षक संग्राम पाटील आणि नरवेली वनरक्षक अपूर्व सावंत यांनी घटनास्थळी भेट देऊन पाहणी केली. परिसरात बिबट्याचा वावर वाढल्याने ग्रामस्थांमध्ये भीतीचे वातावरण पसरले आहे.