दिल्ली हादरली! 32 गाड्यांच्या चिंधड्या, 9 ठार – लाल किल्ल्याजवळ स्फोटाने थरकाप
फरीदाबादमध्ये सापडला मोठा शस्त्रसाठा, सात दहशतवादी आणि दोन डॉक्टर अटकेत
नवी दिल्ली – देशाची राजधानी दिल्ली सोमवारी सायंकाळी झालेल्या भयंकर स्फोटाने हादरली. ऐतिहासिक लाल किल्ल्याजवळील मेट्रो स्टेशनच्या गेट क्रमांक 1 जवळ उभी असलेली i-20 कार सायंकाळी सुमारे 6.52 वाजता स्फोटात उडाली. या भीषण स्फोटात 9 जणांचा मृत्यू झाला असून 24 जण जखमी झाले आहेत. स्फोट इतका तीव्र होता की परिसरातील 32 गाड्यांच्या चिंधड्या उडाल्या, तर अनेकांच्या हातपायांचे अवयव दूरवर फेकले गेले. आजूबाजूच्या इमारतींच्या काचा फुटल्या, आणि मेट्रो स्टेशन परिसरात आग भडकली. या कार स्फोटाच्या सुमारे तीन तासांपूर्वी सुनहेरी मशीदजवळ पार्किंगमध्ये उभ्या होत्या, अशी माहिती मिळाली आहे. दहशतवादी हल्ल्याची शक्यता तपास यंत्रणांनी व्यक्त केली आहे.
दरम्यान, फरीदाबाद मेडिकल कॉलेजमध्ये काल सकाळी मोठी कारवाई करण्यात आली होती. पोलिसांनी तेथून 350 किलो स्फोटके आणि शस्त्रसाठा जप्त केला. दोन डॉक्टरांसह सात दहशतवादी अटकेत असून, त्यांच्या चौकशीतून धक्कादायक माहिती समोर येत आहे. डॉ. आदिल (उत्तर प्रदेश) आणि डॉ. मुजम्मिल (हरियाणा) यांना अटक करण्यात आली असून, या कारवाईचा दिल्लीतील स्फोटाशी संबंध असल्याचा संशय व्यक्त केला जात आहे. फरीदाबाद मेडिकल कॉलेज हे दिल्लीतील स्फोटस्थळापासून केवळ तासाभराच्या अंतरावर आहे.